27 մարտի 2009
Ապօրինի ձեռնարկատիրական գործունեության նոր դեպքերի բացահայտում
Ապօրինի ձեռնարկատիրական գործունեության հաջորդ հայտնաբերումը կատարել է ՀՀ ԿԱ պետեկամուտների կոմիտեի Օպերատիվ-հետախուզական վարչության Մյասնիկյանի բաժինը:
Ապօրինի ձեռնարկատիրական գործունեության հաջորդ հայտնաբերումը կատարել է ՀՀ ԿԱ պետեկամուտների կոմիտեի Օպերատիվ-հետախուզական վարչության Մյասնիկյանի բաժինը: Հարկային մարմինները, ստացված օպերատիվ տեղեկատվության հետքերով հերթական բացահայտումն են կատարել Սայաթ-Նովա 1Ա հասցեում. պարզվել է, որ Երևանի Կոմիտասի անվան պետական կոնսերվատորիայի նկուղային հարկում փայտամշակման արտադրամաս է գործում, որը զբաղվում է բիլլիարդի սեղանների արտադրությամբ: Արտադրամասը գործել է  2009թ.-ի հունվարից` առանց պետական գրանցման: Ապօրինի գործունեությունը ծավալել է մայրաքաղաքի բնակիչ Սեմյոն Անանյանը:
 
Օղու հարյուրավոր շշեր` դրոշմավորված ապօրինի ճանապարհով ձեռք բերված և կրկնակի օգտագործված ակցիզային դրոշմանիշերով
 
Օպերատիվ-հետախուզական վարչության աշխատակիցները անակնկալի են բերել նաև շշալցում իրականացնող «Լոյալ Ալկո» ՍՊԸ-ին, որը գործել է Աբովյան քաղաքում` Երիտասարդության փողոցի թիվ 3 կաթսայատուն հասցեում: Հարկային մարմիններն ապօրինի գործունեության փաստը բացահայտել են ոգելից խմիչքի հենց առաքման պահին. դեպի Դիլիջան ուղևորվող «Ֆորդ տրանզիտ» մակնիշի ավտոմեքենայի բեռնախցում հայտնաբերվել է  ավելի քան 800 շիշ օղի, որոնց կեսից ավելին` 520 շիշը, դրոշմավորված է եղել ապօրինի ճանապարհով ձեռք բերված և կրկնակի օգտագործված ակցիզային դրոշմանիշերով, այն էլ` դրոշմավորման կարգի խախտումներով:
 
Օպերատիվ տեղեկությունների իրացման ընթացքում հիմնավորվել է նաև այն փաստը, որ «Լոյալ Ալկո» ՍՊԸ-ի առաքիչ Վ. Սալարցորցյանը նախապես համաձայնության է եկել Դիլիջանի` դեռևս անհայտ մի քաղաքացու հետ և պարգևավճարի դիմաց հետ է վերցրել իր կողմից իրացված օղիների ակցիզային դրոշմանիշերը: Ստացված 520 ակցիզային դրոշմանիշերն էլ փակցվել էին ամտոմեքենայում հայտնաբերված օղիների վրա: Հաշվարկվում է պետությանը պատճառված վնասի չափը:

Նախապատրաստված նյութերն ուղղարկվել են ՀՀ Պետեկամուտների կոմիտեի հետաքննության վարչություն` հետագա ընթացքը լուծելու համար: