Հարկային վարչարարության բարեփոխումների ծրագրով նախատեսված հրատապ միջոցառումներից այսօր պետական եկամուտների կոմիտեում կարևորվում են ռիսկային ստուգումների համակարգի, հարկային միջնորդների ինստիտուտի ներդրումը, ինչպես նաև հարկային և մաքսային օրենքների կիրառման մասին մեկնաբանությունների տրամադրման նոր մեխանիզմների սահմանումը: ՀՀ ԿԱ ՊԵԿ նախագահի առաջին տեղակալ Ահարոն Չիլինգարյանը  մարտի 23-ին լրագրողներին ներկայացնելով այս երեք հայեցակարգերը, վստահեցրել է, որ դրանց ներդրումը էական առաջընթաց կարող է ապահովել հարկային վարչարարության առումով: Մասնավորապես, ռիսկային ստուգումների հիման վրա ստուգման ենթակա հարկ վճարողների ընտրության համակարգի ներդրումը հնարավորություն կտա ստուգումներ իրականացնել ռիսկային չափանիշների վերլուծության արդյունքում: Սահմանված 30-ից ավելի ցուցանիշների հիման վրա կընտրվեն, բալային համակարգով կգնահատվեն ստուգվող ոլորտներն ու ընկերությունները: Ա. Չիլինգարյանի խոսքերով` «այսպիսով հնարավոր կլինի իրականացնել հասցեական աշխատանք, իսկ պետական ռեսուրսները կօգտագործվեն ավելի արդյունավետ»: Հայեցակարգի համաձայն ավելի «փափուկ» կլինի մոտեցումը փոքր և միջին ձեռնարկատիրության հանդեպ: Ստուգվող ընկերությունների համար առաջին անգամ կսահմանվի, այսպես կոչված, «դեղին գիծ», որտեղ հայտնվածների նկատմամբ կկիրառվեն նախազգուշացման մեխանիզմներ:
    

Երկրորդ հայեցակարգը վերաբերում է «Հարկային միջնորդի» ինստիտուտի ձևավորմանը, դրա զարգացման սկզբունքային ուղղություններին և պետական աջակցության շրջանակներին: «Հարկային միջնորդ-խորհրդատուները, դառնալով հարկային մարմին-հարկ վճարող երկկողմ հարաբերությունների նոր` երրորդ մասնակից, էական դեր կկատարեն հարկատուների հարկային պատրավորու- թյունների որոշման և դրանց կատարման գործում»,-վստահեցրել է ՊԵԿ նախագահի առաջին տեղակալը:

ՊԵԿ հարկային և մաքսային վարչարարության ռազմավարության և պլանավորման վարչության պետ Արման Զարգարյանը ներկայացրել է հարկային և մաքսային օրենքների կիրառման մասին մեկնաբանությունների տրամադրման նոր մեխանիզմների  հայեցակարգը: Դրանով  սահմանվում են  հարկային և մաքսային օրենսդրության դրույթների մեկնաբանության միասնական և մատչելի ընթացակարգեր: «Հարկ վճարողների կողմից հարկային մարմնին հղված բազմաթիվ հարցերը` կապված օրենսդրության այս կամ այն դրույթի, կամ որևէ իրավական ակտի հետ, պետք է ունենան դրանց մեկնաբանման, ապա նաև հարցուպատասխանի շտեմարանի ստեղծման  հստակ մեխանիզմներ: Ի դեպ, նույն հայեցակարգում ոչ միայն սահմանված են  դրանց տրամադրման եղանակները, այլև`  սխալ մեկանբանության համար պատասխանատվության նորմերը»:

Նշված երեք հայեցակարգերը ներկայացվել են ՊԵԿ Հասարակական խորհրդի քննարկմանը,  իսկ առաջիկայում կքննարկվեն նաև «Հայաստանի հաշվապահների և աուդիտորների» ասոցիացիայի և Փաստաբանների միության մասնագետների հետ:

Նշվել է նաև, որ հարկ վճարողների իրազեկվածության  բարձրացման նպատակով պետական եկամուտների կոմիտեն ամսական պարբերականությամբ հրատարակում է «Հարկային և մաքսային համառոտագիր»: Այն իր մեջ ներառում է ամփոփ տեղեկատվություն  օրենսդրական փոփոխությունների քննարկվող օրինագծերի,  կառավարության ծրագրերի և  ներքին կանոնակարգերի վերաբեյալ: Արդեն լույս է տեսել Համառոտագրի 4-րդ համարը: