Որակյալ ծառայություններ մատուցել հարկ վճարողներին` առաջին հերթին պայմաններ ստեղծելով համակարգի աշխատակիցների համար: Կոմիտեի գլխավոր նպատակներից մեկը հիշեցրել  է ՊԵԿ նախագահ Գագիկ Խաչատրյանը` ՀՀ վարչապետ Տիգրան Սարգսյանի հետ շրջելով Աբովյանի տարածքային հարկային տեսչությունում:

Այժմ հարկային մարմիններն այդտեղ հարկ վճարողներին դիմավորում են վերակառուցված և բոլոր պահանջներին համապատասխանող մասնաշենքում:
Աբովյանի`  այս տարի վերանորոգված հարկային տեսչությունն ունի  55 աշխատակից, որոնք սպասարկում են երկու քաղաքային (Աբովյան և Բյուրեղավան) և 30 գյուղական համայնքների 5170 հարկ վճարողների: Կազմակերպչական բարեփոխումների շրջանակներում հիմնանորոգվել է տեսչության շենքը, իսկ առաջիկայում նախատեսվում է տեսչությունը համալրել ժամանակակից նոր համակարգչային տեխնիկայով:

Հիշեցնենք, որ նախորդ տարի բացվել է Վանաձորի տարածքային  հարկային տեսչության նորակառույց շենքը: Այս տարի վերանորոգվել են 10 տարածքային հարկային տեսչություններ` Գավառի, Գորիսի, Էջմիածնի, Նաիրիի, Չարենցավանի, Տաշիրի, Նոյեմբերյանի, Աբովյանի և այլն:

«Այս խնդիրը շատ հրատապ է, քանի որ առանց նորմալ պայմաններ ապահովելու հնարավոր չէ լուրջ բարեփոխումներ իրականացնել և պահանջել միջազգային չափանիշների սպասարկում, հարկային մարմինների ծառայողական պարտականությունների կատարում: 2009թ.-ին 10 տարածքային հարկային տեսչություն ենք համապատասխանեցրել միջազգային չափանիշներին, ընդ որում, խոսքը ոչ միայն շենքային պայմանների, այլ նաև էլեկտրոնային կառավարման  և տեխնիկական հագեցվածության մասին է»,- լրագորղներին հայտնել է ՊԵԿ նախագահը: Այդ առումով Գագիկ Խաչատրյանն ընդգծել է նաև համակարգը որակյալ կադրերով համալրելու հանգամանքը.  «Հարկային բարեփոխումների գործընթացում մեծ տեղ է հատկացվում նաև կադրային և կազմակերպչական աշխատանքներին, որոնց շրջանակներում այս տարի լուրջ քայլեր են իրականացվել հարկային ծառայողների մասնագիտական պատրաստ վածության բարձրացման, ուսումնական դասընթացների անցկացման, աշխատանքային պայմանների բարելավման ուղղությամբ»:

Տեղեկացնենք, որ 2009 թվականին հարկային համակարգում մասնագիտական ատեստավորման է ենթարկվել 1362 հարկային ծառայող, որոնցից 305-ը չի համապատասխանել պահանջվող չափանիշներին: Արդյունքում` 146 աշխատակից նշանակվել է ավելի ցածր պաշտոնների, իսկ 159 ծառայող ազատվել է աշխատանքից: Համակարգում պարբերաբար անցկացվող մրցույթների արդյունքում թափուր աշխատատեղերը համալրվել են առավել բանիմաց և գրագետ կադրերով:

Հարկային համակարգում կադրային բարեփոխումների մյուս ուղղություններից է հարկային ծառայողների վերապատրաստումը և նրանց որակավորման բարձրացումը: Այս նպատակով` տարվա ընթացքում անցկացված դասընթացներին մասնակցել են հազարից ավելի հարկային ծառայողներ, իսկ հարկային ծառայությունում աշխատանքի անցնել ցանկացողների համար կազմակերպված` հարկային համակարգին վերաբերող նախապատրաստական դասընթացներին մասնակցել է շուրջ 430 դիմորդ:

«Պետք է գիտակցել, որ պահանջները փոխվում են. այս փուլում շեշտադրվում է  սպասարկման բարձր կուլտուրայի ձևավորումը ինչպես հարկային, այնպես էլ մաքսային մարմիններում»:

Ի՞նչ բարեփոխումներ են նախատեսվում հարկային ոլորտում 2010թ.-ին` հաշվի առնելով  բյուջեի եկամուտների աճը. լրագրողների այս հարցին ի պատասխան ՊԵԿ նախագահը նշել է, որ նախանշված ցուցանիշներն ապահովվելու են հիմնականում հարկային վարչարարության արդյունավետության բարձրացման հաշվին:

«Եթե գնահատենք անցնող տարին, ապա միանշանակ կարող ենք ասել, որ 2009-ը համակարգի կայացման տարիներից է: 2010թ.-ի բյուջեի համար որոշիչ կլինեն տնտեսության ներքին զարգացումներն ու համաշխարհային ֆինանսատնտեսական ճգնաժամը, բայց, բոլոր դեպքերում,  հարկային մարմինները պատրաստ են կատարել պլանային առաջադրանքը, բայց պետք է նաև հարկատուները հարկերը կամովին վճարեն, որպեսզի հարկային տեսուչը ոչ թե միջամտի, այլ` հսկողություն սահմանի: Այս գործընթացին նաև էլեկտրոնային համակարգի  ձևավորումը կնպաստի` նվազագույնի հասցնելով բիզնեսհարկային մարմին շփումը»: