Գյումրեցի Մարիամ Էլբակյանը ևս այն հաջողակներից է, ում բախտը ժպտացել է հենց առաջին վիճակահանությանը. ԱԱ 76201847 ժ  համարով ՀԴՄ կտրոնի առաջին 7 թվերը համընկնում են, այսինքն` շահել է 500 հազար դրամ: Միայն թե, շահած կտրոնը ձեռքին, Մ.Էլբակյանն օրեր շարունակ չէր կարողանում ստանալ խոշոր շահումը. անհրաժեշտ վավերապայմանները դժվար ընթեռնելի էին:

Շահողը կտրոնը ներկայացրել էր «ВТБ» բանկի Գյումրիի մասնաճյուղ, որտեղ հրաժարվել էին տրամադրել պարգևավճարը` այդ մասին հաղորդագրություն ուղարկելով Պետեկամուտների կոմիտե: 

Մ.Էլբակյանի ներկայացրած կտրոնը մանրակրկիտ ուսումնասիրվել է Պետական եկամուտների կոմիտեի Հարկային ծառայության մասանգետների կողմից: Եզրակացության համաձայն, ՀԴՄ կտրոնը համապատասխանել է օրենսդրության պահանջներին: ՊԵԿ-ը համապատասխան միջնորդագիր է ուղարկել «ВТБ» բանկ, ըստ որի փետրվարի 6-ի վիճակահանության արդյունքում շահած 500 հազար դրամը ենթակա է վճարման:

Մարիամ Էլբակյանը պարգևավճարը ստացել է փետրվարի 27-ին` «ВТБ» բանկի Երևանի կենտրոնական մասնաշենքից: Այդտեղ նրան հանդիսավոր պայմաններում հանձնվել է բանկի «Visa classic» քարտը, որի վրա և փոխանցված էր շահած կես միլիոն դրամը:

Մ.Էլբակյանը լրագրողներին պատմել է, որ իրեն հաջողություն են բերել 1600 դրամ ընդհանուր արժողությամբ գնված թթվասերը, ծխախոտը, հացն ու շոկոլադը: Գնումները կատարվել են Գյումրիի խանութներից մեկում: «Դեռ չենք որոշել, թե ինպես ենք ծախսելու այս գումարը: Բայց մի հարցում վստահ եմ` կտրոն պետք է պահանջել միշտ և ամենուր, անկախ այն բանից` վիճակահանություն կա թե ոչ: Իհարկե, հաճելի է շահել և միանգամից այսքան գումարի տեր դառնալ, բայց հաճելի է նաև, երբ գնում կատարելիս ստիպված չես վաճառողներին  հիշեցնել, որ իրենք պարտավոր են կտրոն տրամադրել: Ի վերջո, ժամանակն է, որ մենք ևս քաղաքակիրթ պետություն ունենանք, և այդ գործում մենք, քաղաքացիներս ևս մեր դերն ունենք: Այնպես որ, շահում ենք մենք, շահում է պետությունը»:

Այսպիսով առաջին վիճակահանության արդյունքում 500 հազար դրամ է շահել 5 մարդ:
 

Ընդհանուր առմամբ, Հարկային ծառայությունում ուսումնասիրվել է անընթեռնելի վավերապայմաններով 30 ՀԴՄ կտրոն. յուրաքանչյուրի վերաբերյալ միջնորդագիր է ուղարկվել բանկեր: Արդյունքում բոլոր շահողներն էլ ստացել են պարգևավճարները:

Հիշեցում. Փետրվարի 27-ը պարգևավճարները ստանալու վերջնաժամկետն է: