Հունվարի 15-ի գնումը կես միլիոն դրամ պարգևեց 22-ամյա Անահիտ Քարամյանին: Հաջողակ քաղաքացուն լրագրողները սպասում էին ACBA CREDIT-AGRICOLE բանկի Դավիթաշենի մասնաճյուղում: Մայրաքաղաքի հենց այդ թաղամասի խանութում էին Անահիտին տրամադրել բախտորոշ կտրոնը` 7 6 2 0 1 8 4 0 համարով: Շահողը հայտնել է, որ ինքը նախընտրել է պարգևավճարը ստանալ ACBA CREDIT-AGRICOLE բանկից` հաշվի առնելով այդտեղի սպասարկման բարձր մակարդակը: Անհրաժեշտ փաստաթղթերը ներկայացնելու նպատակով բանկ ժամանած շահողին անակնկալ էր սպասվում. բանկի մասնաճյուղի ղեկավարությունը շահողի համար օրը վերածել էր տոնի` առանձնահատուկ սպասարկում, ծաղիկներ:

Բայց պարզվում է, վիճակահանության ժամանակ Անահիտի մտքով ամենևին չի անցել, որ հենց ինքն է շահողներից մեկը: «Ստուգել ենք բոլոր կտրոնները և համակերպվել, որ բախտն այս անգամ էլ մեզ չժպտաց: Ավելի ուշ հիշեցի, որ մեկ կտրոն էլ պայուսակիս մեջ կա: Ստուգեցի...  չէր համընկնում միայն վերջին թիվը»:

Անահիտի կտրոնի վրա նշված է, որ հունվարի 15-ին նա գնել է շոկոլադ` 180 դրամով: «Ստացվում է` ընդամենը 180 դրամն ինձ մեկ վայրկյանում, կարելի է ասել, միլիոնատեր դարձրեց»:

Թե ինչ նպատակով է Անահիտը  ծախսելու շահած գումարը, դեռ չի որոշել: «Ֆինկա» վարկային կազմակերպության «Բաղրամյան» մասնաճյուղում որպես վարկային մասնագետ աշխատող Ա. Քարամյանը խոստովանել է, որ 22 տարվա ընթացքում սա իր ամենախոշոր շահումն է: