Միջազգային հարաբերություններ

16 դեկտեմբերի 2015

Մաքսային կարգավորումները` քննարկումների օրակարգում

ՀՀ ֆինանսների նախարարի տեղակալ Արմեն ԳԵՎորգյանի գլխավորած պատվիրկությունը մասնակցել է Մաքսային միության անդամ պետությունների մաքսային ծառայությունների միավորված կոլեգիայի 17-րդ, ինչպես նաԵՎ ԱՊՀ անդամ պետությունների մաքսային ծառայությունների ղեկավարների խորհրդի 62-րդ նիստերին

Հայաստանի Հանրապետության ֆինանսների նախարարի տեղակալ Արմեն Գևորգյանի գլխավորած պատվիրկությունը մասնակցել է Ռուսաստանի Դաշնության Միներալնիյե Վոդի քաղաքում տեղի ունեցած Մաքսային միության անդամ պետությունների մաքսային ծառայությունների միավորված կոլեգիայի 17-րդ, ինչպես նաև ԱՊՀ անդամ պետությունների մաքսային ծառայությունների ղեկավարների խորհրդի 62-րդ նիստերին: Քննարկվել են Մաք¬սային միության անդամ պետությունների մաքսային ծառայությունների միավորված կոլեգիայի 16-րդ նիստին կայացած որոշումների կատարման ընթացքի, ինչպես նաև 17-րդ նիստին ընդգրկված օրակարգի հարցերը, մասնավորապես, թղթային տարբերակով մաքսային հայտարարագրերի փոխանցումը փոփոխելու փորձի արդյունքներին, ԵՏՄ անդամ պետությունների մաքսային մարմինների միջև փոխանցվող ապրանքների տարանցման հայտարարագրերի ռեգիստորների դյուրացման արդյունքներին, ԵՏՄ անդամ պետությունների մաքսային ծառայությունների և անվտանգության ծառայությունների, ներքին գործերի մարմինների միջև տեղեկատվական համագործակցության հնարավորությունն ուսումնասիրելուն, 1994թ. ապրիլի 15-ի Մաքսային գործերում համագործակցության վերաբերյալ Համաձայնագրում փոփոխություններ և լրացումներ կատարելու արձանագրության նախագծին, ապրանքների մաքսային արժեքի հսկողության և որոշման համար անհրաժեշտ տեղեկատվության փոխանակման Համաձայնագրի նախագծին առնչվող հարցեր:

ԵՏՄ անդամ պետությունների մաքսային ծառայությունների ղեկավարների հետ տեղի ունեցած երկկողմ հանդիպումների ընթացքում քննարկվել են երկուստեք հետաքրքրություն ներկայացնող մի շարք հարցեր:

ԱՊՀ անդամ պետությունների մաքսային ծառայությունների ղեկավարների խորհրդի 62-րդ նիստի շրջանակներում ՀՀ ֆինանսների նախարարի տեղակալ Արմեն Գևորգյանը ստորագրել է «ԱՊՀ անդամ պետությունների ազգային տարանցման համակարգերի փոխադարձ ինտեգրման պայմանների ստեղծման մասին Անկախ պետությունների համագործակցության անդամ պետությունների մաքսային ծառայությունների միջև փոխըմբռնման հուշագիրը», ինչպես նաև «Մաքսային բնագավառում Ղազախստանի Հանրապետության և Հայաստանի Հանրապետության համագործակցության ամրապնդմանն ուղղված 2016 թվականի համատեղ գործողությունների ծրագիրը», «Կադրերի վերապատրաստման բնագավառում Ռուսաստանի Դաշնության դաշնային մաքսային ծառայության և Հայաստանի Հանրապետության ֆինանսների նախարարության միջև համագործակցության մասին հուշագիրը»:

Մաքսային միության անդամ պետությունների մաքսային ծառայությունների միավորված կոլեգիայի 17-րդ նիստին ընդունված որոշումների հիման վրա համապատասխան աշխատանքային խմբերին տրվել են հանձնարարականներ՝ ապահովելու ընդունված որոշումների կատարման ընթացքը: Մաքսային միության անդամ պետությունների մաքսային ծառայությունների միավորված կոլեգիայի հաջորդ նիստը տեղի է ունենալու 2016թ. առաջին եռամսյակում Ղազախստանի Հանրապետությունում, իսկ ԱՊՀ անդամ պետությունների մաքսային ծառայությունների ղեկավարների խորհրդի հաջորդ նիստը տեղի է ունենալու 2016թ. երկրորդ եռամսյակում Ղրղզստանի Հանրապետությունում: