14 Հոկտեմբեր 2008
Վերլուծությունը ցույց է տալիս, որ ՀՀ պետական եկամուտների կոմիտեում «Թեժ գծի» ստեղծումը անհրաժեշտություն էր
Մաքսային ծառայության «Թեժ գծով» (53-55-73) 6 ամսվա ընթացքում ստացվել է շուրջ 5000 զանգ, շուրջ 100 բողոք բավարարվել է
Մաքսային ծառայության   «Թեժ գծով» (53-55-73)
6 ամսվա ընթացքում ստացվել է շուրջ 5000 զանգ, շուրջ 100 բողոք
բավարարվել է

 
«...Եթե մաքսային ծառայողի կողմից անհարկի ձգձգվում է մաքսային ձևակերպումների գործընթացը...առաջ են քաշվում ոչ օրինական պահանջներ...եթե մաքսային ծառայողը  Ձեր նկատմամբ եղել է ոչ քաղաքավարի... Դիմեք «Թեժ գծի» օգնությանըª  53-55-73»:
 Այս բովանդակությամբ հայտարարություններ կես տարի առաջ հայտնվեցին բոլոր մաքսակետերում/մաքսատներում, վստահության հեռախոսի համարը տեղադրված է նաև մաքսային ծառայության պաշտոնական կայքում:  
Որպես մաքսայինի «Թեժ գիծ», 53-55-73 հեռախոսահամարն արտաքին տնտեսական գործունեություն իրականացնող սուբյեկտներին հայտնի է ապրիլից: Առ այսօր արձանագրված զանգերի վերլուծությունը փաստում է, որ նման ծառայության առկայությունը խիստ անհրաժեշտ էր համակարգի հետ այս կամ այն կերպ առնչվող անձանց համար:
Վերջին 6 ամսվա ընթացքում հարյուրավոր տնտեսվարողների բողոքի ձայնը հասել է անմիջապես Կոմիտեի նախագահին, ում հանձնարարությամբ, առավելագույնը մեկ օրում, իսկ հարկ եղած դեպքում` հաշված ժամերի-րոպեների ընթացքում գտնվել է առաջացած բոլոր խնդիրների լուծումը:
«Պետական եկամուտների կոմիտեի նախագահի կողմից հստակ պահանջ է դրվել` էլ ավելի բարձրացնել վստահությունը համակարգի նկատմամբ. քաղաքացին պետք է հավատա, որ ի զորու է պայքարել ոտնահարված իրավունքների վերականգնման համար: Այդ նպատակն իրականություն դարձնելու համար ընտրվեց արդյունավետ տարբերակ` քաղաքացիներին հնարավորություն տրվեց իրենց բողոքներն ու առաջարկները ներկայացնել «Թեժ գծի» և էլեկտրոնային փոստի միջոցով: Իր բողոքը բարձրաձայնող քաղաքացին պետք է վստահ լինի, որ իր խնդիրն անմիջապես ներկայացվում է Կոմիտեի նախագահին»,- լրագրողների հետ հանդիպման ընթացքում նշել է Կոմիտեի նախագահի խորհրդական Միքայել Փաշայանը` միաժամանակ կոչ անելով այս կամ այն խնդրին բախվելիս անմիջապես հիշել «Թեժ գծի» մասին:
Այսպիսով, «Թեժ գծով» ստացվող յուրաքանչյուր բողոքի կամ առաջարկի մասին անմիջապես տեղեկանում է Կոմիտեի ղեկավարը:
«Ինչո±ւ է մաքսակետում առաջացել այս կամ այն խնդիրը և ում մեղքով. Գագիկ Խաչատրյանի հանձնարարությամբ ու անմիջական վերահսկողությամբ ստորաբաժանումների ղեկավարներն օպերատիվ ժամանակահատվածում մանրամասն ուսումնասիրում են ահազանգի իրական պատճառները և պահանջվող ժամկետներում զեկուցում: Այնպես որ, ոչ մի զանգ անպատասխան չի մնում: Ավելին, կախված անհրաժեշտությունից, պատասխանատուները զանգահարում են քաղաքացուն, գրավոր պատասխանում, հրավիրում Կոմիտե` անձամբ պարզաբանումներ տալու նպատակով»:
Արձանագրվում են նաև այնպիսի դեպքեր, երբ բողոքն իրականում որևէ առնչություն չի ունենում Կոմիտեի գործառույթների հետ, բայց, չնայած դրան, Կոմիտեում ընդառաջում են տվյալ քաղաքացուն: Այս հանգամանքը շեշտել է Պետական եկամուտների կոմիտեի տեղեկատվության և հասարակայնության հետ կապերի բաժնի պետ Նելլի Մանուչարյանը, մեջբերելով  կոնկրետ  օրինակներ:
«Օրինակ, «Թեժ գծին» դիմող քաղաքացիներից մեկի բեռը, մաքսակետը հատելուց հետո Վրաստան ուղևորվելու ճանապարհին անհետացել էր: Քաղաքացուն ինչ-որ կերպ օգնելու նպատակով նախ հրավիրել էին Կոմիտե, որտեղ համապատասխան ստորաբաժանման ղեկավարը զրուցել էր նրա հետ և ծանոթացել գործի մանրամասներին: Այնուհետև Կոմիտեն հարցում էր ուղղարկել Վրաստանի մաքսային գերատեսչությանը, և արդյունքում ճշտվել էր, որ բեռը գտնվում է «Փոթի» նավահանգստում: Ընկերության ներկայացուցիչն այնուհետև կրկին զանգահարել էր Կոմիտե և հայտնել իր գոհունակությունը, որ, թեև հարցի լուծումը Կոմիտեի իրավասության շրջանակներում չէր, սակայն հենց այդ կառույցն օգնեց կարգավորել խնդիրը»:
Նելլի Մանուչարյանը տեղեկացրել է, որ Կոմիտեն արտաքին տնտեսական գործունեություն իրականացնող անձանց էապես աջակցել է նաև վրաց-օսական հակամարտության ժամանակ: Որոշ բողոքների հիման վրա  Պետական եկամուտների կոմիտեի ղեկավարը գրություն է հղել ՌԴ մաքսային ծառայության ղեկավարին` խնդրանքով հաշվի առնել հակամարտության հետևանքով ՀՀ արտահանողների համար ծագած խնդիրներն ու դրանց լուծման համար քայլեր ձեռնարկել:
Լրագրողներին հետաքրքրել է նաև, թե ի±նչ կարգի բողոքներ են հիմնականում ստացվում, կա±ն դեպքեր, երբ խնդրի առաջացման պատճառը մաքսավորն է եղել: Կոմիտեի տեղեկատվության և հասարակայնության հետ կապերի բաժնի պետը հայտնել է, որ որոշ ահազանգեր վերաբերել են մաքսավորների վարքին. քաղաքացիները բողոքել են իրենց նկատմամբ կոպիտ վերաբերմունքից: Նման դեպքերում Կոմիտեի վերահսկողության վարչությունը ծառայողական քննություն է իրականացրել: Եթե բողոքը հիմնավոր է եղել, ապա խնդրին համապատասխան լուծում է տրվել: Սակայն բազմաթիվ են նաև այնպիսի դեպքերը, երբ բողոքը հանգամանալից ուսումնասիրելուց հետո Կոմիտե հրավիրված քաղաքացին ընդունել է, որ իր բողոքն, իրոք, անհիմն է:  
Բողոքներ կամ առաջարկներ ներկայացնելուց բացի (ապրիլի 21-ից մինչև հոկտեմբերի 14-ը բողոքների թիվը շուրջ 100 է), «Թեժ գծով» զանգահարողներին հիմնականում հետաքրքրում են`
• Մաքսային ծառայության պաշտոնական կայքից օգտվելու ձևերը
• Ծառայության ստորաբաժանումների հեռախոսահամարներ
• Մաքսային մարմիններից խորհրդատվություն ստանալու կարգը (նրանց հանգամանալից տեղեկացվում է, որ տարածքային մաքսային մարմիններում խորհրդատվություն կազմակերպվում է ամեն օր, իսկ կենտրոնական ապարատում` շաբաթ օրերին, ժամը 11-ից 13-ն ընկած ժամանակահատվածում):
 
Հարկային ծառայության  «Թեժ գծին»( 59-46-18)
դիմողները ևս դժգոհ չեն մնացել

 
Հարկային համակարգում «Թեժ գիծ» գործում է տարեսկզբից: Հենց վստահության հեռախոսի միջոցով պարզ դարձավ, որ հարկատուներն օրենսդրության և դրանցում կատարվող փոփոխությունների իրազեկման կարիք ունեն: Մինչ այդ չկար մի ենթակառույց, որտեղ նրանք կարող էին հետաքրքրող հարցերի լիարժեք պատասխան ստանալ:
Քաղաքացիների ակտիվությունը նկատվել է «Թեժ գծի» ներդրման առաջին իսկ օրերից (հունվարի 31-ից). միայն առաջին 15 օրվա ընթացքում «Թեժ գծին» դիմել են շուրջ 1200 հարկ վճարող և սեփական գործ սկսող քաղաքացիներ, ովքեր պարզաբանումներ են ստացել հարկային օրենսդրության վերաբերյալ:
Յուրաքանչյուր երրորդ հարցը վերաբերել է պարզեցված հարկի փոփոխություններին, հիմնականում բողոքի տեսքով` արտադրող փոքր ձեռնարկությունների ներկայացուցիչների կողմից:
«Թեժ գծի» օգնությանը դիմել են վաղուց լուծարված ԱՁ-ներ, ՍՊԸ-ներ, որոնք միլիոնների հասնող տույժ ու տուգանքներ են կուտակել` օրենքի չիմացության կամ տեսչությունների անփույթ աշխատանքի պատճառով: Խնդրի բարձրաձայնման արդյունքում այն ընդգրկվել է բարեփոխումների փաթեթում:
Հարկայինի «Թեժ գծի» օգնությանը դիմող քաղաքացիների մի մասի դժգոհությունը կապված է եղել հարկային վարչարարության հետ:
Այս փուլում «Թեժ գծին» դիմողները հիմնականում հետաքրքրվում են առևտրի կազմակերպման վայրերում ՀԴՄ-ների տեղադրման գործընթացով և օրենսդրական վերջին փոփոխություններով: Մասնագետները նրանց պարզաբանումներ են տալիս օպերատիվ կարգով: Հարկային մարմնի հետ առնչվող անձանց համար  նաև խորհրդատվություն է կազմակերպվում. հետաքրքրող բոլոր հարցերի պատասխանները նրանք կարող են ստանալ տարածքային հարկային մարմինների  սպասարկման բաժիններում: